hangama-e-sukut bapa kar chuke hain hum

hañgāma-e-sukūt bapā kar chuke haiñ ham

ik 'umr us galī meñ sadā kar chuke haiñ ham

apne ġhazāl-e-dil kā nahīñ mil rahā surāġh

sahrā se shahr tak to patā kar chuke haiñ ham

ab tesha-e-nazar se ye dil TūTtā nahīñ

is aa.ine ko sañg-numā kar chuke haiñ ham

har baar apne paañv ḳhalā meñ aTak ga.e

sau baar ḳhud ko rizq-e-havā kar chuke haiñ ham

ab is ke baa'd kuchh bhī nahīñ iḳhtiyār meñ

vo jabr thā ki ḳhud ko ḳhudā kar chuke haiñ ham

hangama-e-sukut bapa kar chuke hain hum

ek 'umr us gali mein sada kar chuke hain hum

apne ghazal-e-dil ka nahin mil raha suragh

sahra se shahr tak to pata kar chuke hain hum

ab tesha-e-nazar se ye dil TuTta nahin

is aaine ko sang-numa kar chuke hain hum

har bar apne panw KHala mein aTak gae

sau bar KHud ko rizq-e-hawa kar chuke hain hum

ab is ke ba'd kuchh bhi nahin iKHtiyar mein

wo jabr tha ki KHud ko KHuda kar chuke hain hum