hangama garm hasti-e-na-paedar ka

hangāma garm hasti-e-nā-pā.edār kā

chashmak hai barq kī ki tabassum sharār kā

maiñ jo shahīd huuñ lab-e-ḳhāndān-e-yār kā

kyā kyā charāġh hañstā hai mere mazār kā

ho rāz-e-dil na yaar se poshīda yaar kā

parda na darmiyāñ ho jo dil ke ġhubār kā

us rū-e-tābnāk pe har qatra-e-araq

goyā ki ik sitāra hai sub.h-e-bahār kā

hai ain-e-vasl meñ bhī mirī chashm sū-e-dar

lapkā jo paḌ gayā hai mujhe intizār kā

pahuñchegā tere paas kabūtar se pesh-tar

maktūb-e-shauq uḌā ke tire be-qarār kā

ho pāk-dāmanoñ ko ḳhalish gar se kyā ḳhatar

khaTkā nahīñ nigāh ko mizhgāñ ke ḳhaar kā

bujhne kī dil kī aag nahīñ zer-e-ḳhāk bhī

hogā daraḳht gor pe merī chinār kā

dekh apne dar-e-gosh ko 'āriz se muttasil

dekhā na ho sitāra jo sub.h-e-bahār kā

pūchhe hai kyā halāvt-e-talḳhāba-e-sarishk

sharbat hai bāġh-e-ḳhuld-e-barīñ ke anaar kā

hai dil kī daao ghaat meñ mizhgāñ se chashm-e-yār

hai shauq us kī TaTTī kī ojhal shikār kā

qāsid likhūñ lifāfa-e-ḳhat ko ġhubār se

tā jaane vo ye ḳhat hai kisī ḳhāksār kā

ai 'zauq' hosh gar hai to duniyā se duur bhaag

is mai-kade meñ kaam nahīñ hoshiyār kā

hangama garm hasti-e-na-paedar ka

chashmak hai barq ki ki tabassum sharar ka

main jo shahid hun lab-e-KHandan-e-yar ka

kya kya charagh hansta hai mere mazar ka

ho raaz-e-dil na yar se poshida yar ka

parda na darmiyan ho jo dil ke ghubar ka

us ru-e-tabnak pe har qatra-e-araq

goya ki ek sitara hai subh-e-bahaar ka

hai ain-e-wasl mein bhi meri chashm su-e-dar

lapka jo paD gaya hai mujhe intizar ka

pahunchega tere pas kabutar se pesh-tar

maktub-e-shauq uDa ke tere be-qarar ka

ho pak-damanon ko KHalish gar se kya KHatar

khaTka nahin nigah ko mizhgan ke KHar ka

bujhne ki dil ki aag nahin zer-e-KHak bhi

hoga daraKHt gor pe meri chinar ka

dekh apne dar-e-gosh ko 'ariz se muttasil

dekha na ho sitara jo subh-e-bahaar ka

puchhe hai kya halawt-e-talKHaba-e-sarishk

sharbat hai bagh-e-KHuld-e-barin ke anar ka

hai dil ki dao ghat mein mizhgan se chashm-e-yar

hai shauq us ki TaTTi ki ojhal shikar ka

qasid likhun lifafa-e-KHat ko ghubar se

ta jaane wo ye KHat hai kisi KHaksar ka

ai 'zauq' hosh gar hai to duniya se dur bhag

is mai-kade mein kaam nahin hoshiyar ka