hangama kyun bapa hai zara baam par se dekh

hañgāma kyuuñ bapā hai zarā baam par se dekh

shole buland hote haiñ ye kis ke ghar se dekh

bikhreñ na ye zamīñ pe kahīñ chashm-e-tar se dekh

palkoñ tak aa ga.e haiñ jo chal kar jigar se dekh

ai dost pairvī-e-kalīmāna hai abas

jalvoñ ko us ke tū nigah-e-mo.tabar se dekh

yuuñ sar uThā ke dekh na tū jānib-e-falak

ye tāj-e-tamkanat na gire tere sar se dekh

is tarah hai ġhamoñ ko mire dil se rasm-o-rāh

jis tarah rabt rakhte haiñ saa.e shajar ke dekh

apnī nazar se dekh tahī-dastī-e-sadaf

dariyā kā zarf kyā hai ye chashm-e-guhar se dekh

insān hādsāt se kitnā qarīb hai

tū bhī zarā nikal ke kabhī apne ghar se dekh

'ājiz' ye qaul apne buzurgoñ kā yaad rakh

rasta kabhī na chhoḌnā dushman ke Dar se dekh

hangama kyun bapa hai zara baam par se dekh

shole buland hote hain ye kis ke ghar se dekh

bikhren na ye zamin pe kahin chashm-e-tar se dekh

palkon tak aa gae hain jo chal kar jigar se dekh

ai dost pairwi-e-kalimana hai abas

jalwon ko us ke tu nigah-e-motabar se dekh

yun sar uTha ke dekh na tu jaanib-e-falak

ye taj-e-tamkanat na gire tere sar se dekh

is tarah hai ghamon ko mere dil se rasm-o-rah

jis tarah rabt rakhte hain sae shajar ke dekh

apni nazar se dekh tahi-dasti-e-sadaf

dariya ka zarf kya hai ye chashm-e-guhar se dekh

insan hadsat se kitna qarib hai

tu bhi zara nikal ke kabhi apne ghar se dekh

'ajiz' ye qaul apne buzurgon ka yaad rakh

rasta kabhi na chhoDna dushman ke Dar se dekh