hansate hain mujhko rulane se pahle

hañsāte haiñ mujh ko rulāne se pahle

banāne kī koshish miTāne se pahle

rihā ho ke ab kyā gulistāñ ko jā.ūñ

ḳhizāñ aa ga.ī mere aane se pahle

talātum se zor āzmānā paḌegā

safīne ko sāhil pe laane se pahle

na ban jaa.e ummīd māyūs ġham ko

koī soch le muskurāne se pahle

na pūchh un kī maḳhmūr nazroñ kā aalam

sahārā milā laḌkhaḌāne se pahle

na ye bijliyāñ thiiñ na ye āñdhiyāñ thiiñ

hamāre nasheman banāne se pahle

zarā apne dil ke taqāze to samjho

mire dil kī duniyā miTāne se pahle

mire dil kī be-tābiyāñ rang lā.īñ

vo ḳhud aa ga.e yaad aane se pahle

na ye dilkashī thī na rangīniyāñ thiiñ

'sa.īd' un ke tashrīf laane se pahle

hansate hain mujh ko rulane se pahle

banane ki koshish miTane se pahle

riha ho ke ab kya gulistan ko jaun

KHizan aa gai mere aane se pahle

talatum se zor aazmana paDega

safine ko sahil pe lane se pahle

na ban jae ummid mayus gham ko

koi soch le muskurane se pahle

na puchh un ki maKHmur nazron ka aalam

sahaara mila laDkhaDane se pahle

na ye bijliyan thin na ye aandhiyan thin

hamare nasheman banane se pahle

zara apne dil ke taqaze to samjho

mere dil ki duniya miTane se pahle

mere dil ki be-tabiyan rang lain

wo KHud aa gae yaad aane se pahle

na ye dilkashi thi na ranginiyan thin

'said' un ke tashrif lane se pahle