hansi masum si bachchon ki copy mein ibarat si

hañsī ma.asūm sī bachchoñ kī copy meñ ibārat sī

hiran kī piiTh par baiThe parinde kī sharārat sī

vo jaise sardiyoñ meñ garm kapḌe de faqīroñ ko

laboñ pe muskurāhaT thī magar kaisī hiqārat sī

udāsī pat-jhaḌoñ kī shaam oḌhe rāsta taktī

pahāḌī par hazāroñ saal kī koī imārat sī

sajā.e bāzuoñ par baazū vo maidāñ meñ tanhā thā

chamaktī thī ye bastī dhuup meñ tārāj o ġhārat sī

merī āñkhoñ mere hoñToñ pe ye kaisī tamāzat hai

kabūtar ke paroñ kī reshmī ujlī harārat sī

khilā de phuul mere baaġh meñ paiġhambaroñ jaisā

raqam ho jis kī peshānī pe ik aayat bashārat sī

hansi masum si bachchon ki copy mein ibarat si

hiran ki piTh par baiThe parinde ki shararat si

wo jaise sardiyon mein garm kapDe de faqiron ko

labon pe muskurahaT thi magar kaisi hiqarat si

udasi pat-jhaDon ki sham oDhe rasta takti

pahaDi par hazaron sal ki koi imarat si

sajae bazuon par bazu wo maidan mein tanha tha

chamakti thi ye basti dhup mein taraj o ghaarat si

meri aankhon mere honTon pe ye kaisi tamazat hai

kabutar ke paron ki reshmi ujli hararat si

khila de phul mere bagh mein paighambaron jaisa

raqam ho jis ki peshani pe ek aayat bashaarat si