hansna rona pana khona marna jina pani par

hañsnā ronā paanā khonā marnā jiinā paanī par

paḌhiye to kyā kyā likkhā hai dariyā kī peshānī par

mahñgā.ī hai daam mileñge sochā thā ham ne lekin

sharminda ho kar lauTe haiñ ḳhvāboñ kī arzānī par

ab tak ujḌe-pan meñ shāyad kuchh nazzāroñ laa.eq hai

varna jamghaT kyuuñ umDā rahtā hai is vīrānī par

raat jo āñkhoñ meñ chamke jugnū maiñ un kā shāhid huuñ

aap bhale charchā kariye ab sūraj kī tābānī par

sub.h-saverā daftar biivī bachche mahfil nīndeñ raat

yaar kisī ko mushkil bhī hotī hai is āsānī par

us kī sapnoñ vaalī pariyāñ kyuuñ maiñ dekh nahīñ paatā

bachcha hairāñ hai mujh par maiñ bachche kī hairānī par

ek achhūtā manzar mujh ko chhū kar guzrā thā ab to

pachhtānā hai ḳhud meñ Duube rahne kī nādānī par

ham fankāroñ kī fitrat se vāqif ho tum to 'akhilesh'

maqsad samho ruk mat jaanā bas lafzoñ ke ma.anī par

hansna rona pana khona marna jina pani par

paDhiye to kya kya likkha hai dariya ki peshani par

mahngai hai dam milenge socha tha hum ne lekin

sharminda ho kar lauTe hain KHwabon ki arzani par

ab tak ujDe-pan mein shayad kuchh nazzaron laeq hai

warna jamghaT kyun umDa rahta hai is virani par

raat jo aankhon mein chamke jugnu main un ka shahid hun

aap bhale charcha kariye ab suraj ki tabani par

subh-sawera daftar biwi bachche mahfil ninden raat

yar kisi ko mushkil bhi hoti hai is aasani par

us ki sapnon wali pariyan kyun main dekh nahin pata

bachcha hairan hai mujh par main bachche ki hairani par

ek achhuta manzar mujh ko chhu kar guzra tha ab to

pachhtana hai KHud mein Dube rahne ki nadani par

hum fankaron ki fitrat se waqif ho tum to 'akhilesh'

maqsad samho ruk mat jaana bas lafzon ke mani par