hanuz ishq mein shoala sa jal bujha kya hai

hanūz ishq meñ sho.ala sā jal bujhā kyā hai

na-jāne aaj bhī vahshat meñ sar-phirā kyā hai

faqīr aa.e the mahfil meñ terī sunñe ko

vo baat tujh meñ sunāne kā hausla kyā hai

vafā hai mujh se ḳhafā aur tū ḳhafā mujh se

zarā ye dekh jafā ne terī kiyā kyā hai

ye merā sabr bhī jo kaam mere aa na sakā

to ai ḳhudā ye mirā tujh pe aasrā kyā hai

sadā-e-shauq ko mahmez kar rahī hai havā

bisāt apnī vagarna yahāñ sivā kyā hai

ye ḳhāk-e-des hai yā hai ye ḳhāk-e-karb-o-balā

lahū se karte haiñ sairāb mājrā kyā hai

samajhnā chāho to 'zahrā' se ziist ko samjho

nafi sabāt man-o-tū mo.āmla kyā hai

hanuz ishq mein shoala sa jal bujha kya hai

na-jaane aaj bhi wahshat mein sar-phira kya hai

faqir aae the mahfil mein teri sunne ko

wo baat tujh mein sunane ka hausla kya hai

wafa hai mujh se KHafa aur tu KHafa mujh se

zara ye dekh jafa ne teri kiya kya hai

ye mera sabr bhi jo kaam mere aa na saka

to ai KHuda ye mera tujh pe aasra kya hai

sada-e-shauq ko mahmez kar rahi hai hawa

bisat apni wagarna yahan siwa kya hai

ye KHak-e-des hai ya hai ye KHak-e-karb-o-bala

lahu se karte hain sairab majra kya hai

samajhna chaho to 'zahra' se zist ko samjho

nafi sabaat man-o-tu moamla kya hai