haq bana baatil bana naqis bana kaamil bana

haq banā bātil banā nāqis banā kāmil banā

jo banānā ho banā lekin kisī qābil banā

shauq ke laa.iq banā armān ke qābil banā

ahl-e-dil banñe kī hasrat hai to dil ko dil banā

uqda to be-shak khulā lekin ba-sad-diqqat khulā

kaam to be-shak banā lekin ba-sad mushkil banā

jab ubhārā hai to apne qurb kī had tak ubhār

jab banāyā hai to apne lutf ke qābil banā

sab jahānoñ se judā apnā jahāñ taḳhlīq kar

sab makānoñ se judā apnā makān-e-dil banā

phir na.e sar se junūn-e-qais kī buniyād rakh

phir na.ī lailā banā naaqa banā mahmil banā

ye to samjhe aaj 'āzād' ek kāmil fard hai

ye na samjhe ek nāqis kis tarah kāmil banā

haq bana baatil bana naqis bana kaamil bana

jo banana ho bana lekin kisi qabil bana

shauq ke laiq bana arman ke qabil bana

ahl-e-dil banne ki hasrat hai to dil ko dil bana

uqda to be-shak khula lekin ba-sad-diqqat khula

kaam to be-shak bana lekin ba-sad mushkil bana

jab ubhaara hai to apne qurb ki had tak ubhaar

jab banaya hai to apne lutf ke qabil bana

sab jahanon se juda apna jahan taKHliq kar

sab makanon se juda apna makan-e-dil bana

phir nae sar se junun-e-qais ki buniyaad rakh

phir nai laila bana naqa bana mahmil bana

ye to samjhe aaj 'azad' ek kaamil fard hai

ye na samjhe ek naqis kis tarah kaamil bana