haq ke sanche mein hum jo Dhal jaen

haq ke sāñche meñ ham jo Dhal jaa.eñ

hādse ḳhud saroñ se Tal jaa.eñ

dosto ab bhī kuchh nahīñ bigḌā

ab bhī hai vaqt ham sañbhal jaa.eñ

mere phūloñ kī qadr baḌh jaa.e

in ko pairoñ se vo kuchal jaa.eñ

vo sharāb-e-kuhan diloñ meñ uñDel

jis kī tundī se ye pighal jaa.eñ

mere ashkoñ ko pochhne vaale

kahīñ tere na haath jal jaa.eñ

ham-safar 'ilm hai tujhe na mujhe

kab kahāñ rāste badal jaa.eñ

ġhair mumkin hai khoTe sikke tire

mere bāzār meñ bhī chal jaa.eñ

soz ġhazloñ meñ aisā bhar 'rizvān'

sun ke ahl-e-nazar machal jaa.eñ

haq ke sanche mein hum jo Dhal jaen

hadse KHud saron se Tal jaen

dosto ab bhi kuchh nahin bigDa

ab bhi hai waqt hum sanbhal jaen

mere phulon ki qadr baDh jae

in ko pairon se wo kuchal jaen

wo sharab-e-kuhan dilon mein unDel

jis ki tundi se ye pighal jaen

mere ashkon ko pochhne wale

kahin tere na hath jal jaen

ham-safar 'ilm hai tujhe na mujhe

kab kahan raste badal jaen

ghair mumkin hai khoTe sikke tere

mere bazar mein bhi chal jaen

soz ghazlon mein aisa bhar 'rizwan'

sun ke ahl-e-nazar machal jaen