حق کو ہم نے تو سدا پھولتے پھلتے دیکھا

حق کو ہم نے تو سدا پھولتے پھلتے دیکھا

تیز آندھی میں بھی اس شمع کو جلتے دیکھا

جن کی اقلیم میں ہوتی ہی نہ تھی شام کبھی

آفتاب ان کی حکومت کا بھی ڈھلتے دیکھا

ایک پربت کی چڑھائی ہے یہ عہد ہستی

جو چڑھا دوڑ کے اس کو ہی پھسلتے دیکھا

جن پہ چھایا تھا رعونت کا نشہ بے پایاں

ٹھوکریں کھا کے بھی ان کو نہ سنبھلتے دیکھا

رونق بزم تو کیا لائق محفل بھی نہیں

ہم نے اپنا کوئی ارماں نہ نکلتے دیکھا

کون ہے وہ جسے اب سائے سے بھی نفرت ہے

ہم نے جب دیکھا اسے دھوپ میں چلتے دیکھا

وقت کی بات ہے وہ قافلہ سالار ہیں آج

گڑگڑاتے جنہیں دیکھا ہے مچلتے دیکھا

کبھی آئین کی توہین گوارا کر لی

کبھی انصاف کا سر ہم نے کچلتے دیکھا

ایک جان اور دو قالب تھے مصورؔ جو کبھی

ایسا وقت آیا کہ ان کو بھی بدلتے دیکھا