haq-nawai ko zamane ki zaban kaun kare

haq-navā.ī ko zamāne kī zabāñ kaun kare

aisī talḳhī ko 'samad' lazzat-e-jāñ kaun kare

ab sar-e-dār vafāoñ ke liye kaun aa.e

chand ḳhvāboñ ke liye tark-e-jahāñ kaun kare

ham ne maanā ki baḌī chiiz hai pābandī-vaqt

sajda-e-shauq ko pāband-e-azāñ kaun kare

vaqt kī chaap se gūñjī hai mirī tanhā.ī

vaqt kī chaap ko ab aur garāñ kaun kare

kaun ūñchī kare bujhte hue anfās kī lau

is añdhere meñ talāsh-e-rag-e-jāñ kaun kare

sho.ala-e-fikr pe sūraj kā gumāñ hotā hai

sho.ala-e-fikr ko mohtāj-e-bayāñ kaun kare

ham vo patthar haiñ ki saiqal ho to ā.īna baneñ

sañg par mashk-e-fan-e-shīsha-garāñ kaun kare

kaun dikhlā.e haqīqat ko 'samad' rāh-e-majāz

hāsil-e-dīda-o-dil nazr-e-butāñ kaun kare

haq-nawai ko zamane ki zaban kaun kare

aisi talKHi ko 'samad' lazzat-e-jaan kaun kare

ab sar-e-dar wafaon ke liye kaun aae

chand KHwabon ke liye tark-e-jahan kaun kare

hum ne mana ki baDi chiz hai pabandi-waqt

sajda-e-shauq ko paband-e-azan kaun kare

waqt ki chap se gunji hai meri tanhai

waqt ki chap ko ab aur garan kaun kare

kaun unchi kare bujhte hue anfas ki lau

is andhere mein talash-e-rag-e-jaan kaun kare

shoala-e-fikr pe suraj ka guman hota hai

shoala-e-fikr ko mohtaj-e-bayan kaun kare

hum wo patthar hain ki saiqal ho to aaina banen

sang par mashk-e-fan-e-shisha-garan kaun kare

kaun dikhlae haqiqat ko 'samad' rah-e-majaz

hasil-e-dida-o-dil nazr-e-butan kaun kare