haq wafa ke jo hum jatane lage

haq vafā ke jo ham jatāne lage

aap kuchh kah ke muskurāne lage

thā yahāñ dil meñ tān-e-vasl-e-adū

uzr un kī zabāñ pe aane lage

ham ko jiinā paḌegā furqat meñ

vo agar himmat āzmāne lage

Dar hai merī zabāñ na khul jaa.e

ab vo bāteñ bahut banāne lage

jaan bachtī nazar nahīñ aatī

ġhair ulfat bahut jatāne lage

tum ko karnā paḌegā uzr-e-jafā

ham agar dard-e-dil sunāne lage

saḳht mushkil hai sheva-e-taslīm

ham bhī āḳhir ko jī churāne lage

jī meñ hai luuñ razā-e-pīr-e-muġhāñ

qāfile phir haram ko jaane lage

sirr-e-bātin ko faash kar yā rab

ahl-e-zāhir bahut satāne lage

vaqt-e-ruḳhsat thā saḳht 'hālī' par

ham bhī baiThe the jab vo jaane lage

haq wafa ke jo hum jatane lage

aap kuchh kah ke muskurane lage

tha yahan dil mein tan-e-wasl-e-adu

uzr un ki zaban pe aane lage

hum ko jina paDega furqat mein

wo agar himmat aazmane lage

Dar hai meri zaban na khul jae

ab wo baaten bahut banane lage

jaan bachti nazar nahin aati

ghair ulfat bahut jatane lage

tum ko karna paDega uzr-e-jafa

hum agar dard-e-dil sunane lage

saKHt mushkil hai shewa-e-taslim

hum bhi aaKHir ko ji churane lage

ji mein hai lun raza-e-pir-e-mughan

qafile phir haram ko jaane lage

sirr-e-baatin ko fash kar ya rab

ahl-e-zahir bahut satane lage

waqt-e-ruKHsat tha saKHt 'haali' par

hum bhi baiThe the jab wo jaane lage