haqiqat mahram-e-asrar se puchh

haqīqat mahram-e-asrār se pūchh

mazā añgūr kā mai-ḳhvār se pūchh

vafā aġhyār kī aġhyār se sun

mirī ulfat dar o dīvār se pūchh

hamārī āh-e-be-tāsīr kā haal

kuchh apne dil se kuchh aġhyār se pūchh

diloñ meñ Dālnā zauq-e-asīrī

kamand-e-gesū-e-ḳhamdār se pūchh

dil-e-mahjūr se sun lazzat-e-vasl

nashāt-e-āfiyat bīmār se pūchh

nahīñ juz girya-e-ġham hāsil-e-ishq

hamārī chashm-e-dariyā-bār se pūchh

nahīñ āb-e-baqā juz jalva-e-dost

kisī lab-tishna-e-dīdār se pūchh

fareb-e-vāda-e-dildār kī qadr

shahīd-e-ḳhanjar-e-inkār se pūchh

fuġhān-e-shauq ko maane nahīñ vasl

ye nukta andalīb-e-zār se pūchh

tasavvur meñ kiyā karte haiñ jo ham

vo tasvīr-e-ḳhayāl-e-yār se pūchh

matā-e-be-bahā hai sher-e-'hālī'

mirī qīmat mirī guftār se pūchh

haqiqat mahram-e-asrar se puchh

maza angur ka mai-KHwar se puchh

wafa aghyar ki aghyar se sun

meri ulfat dar o diwar se puchh

hamari aah-e-be-tasir ka haal

kuchh apne dil se kuchh aghyar se puchh

dilon mein Dalna zauq-e-asiri

kamand-e-gesu-e-KHamdar se puchh

dil-e-mahjur se sun lazzat-e-wasl

nashat-e-afiyat bimar se puchh

nahin juz girya-e-gham hasil-e-ishq

hamari chashm-e-dariya-bar se puchh

nahin aab-e-baqa juz jalwa-e-dost

kisi lab-tishna-e-didar se puchh

fareb-e-wada-e-dildar ki qadr

shahid-e-KHanjar-e-inkar se puchh

fughan-e-shauq ko mane nahin wasl

ye nukta andalib-e-zar se puchh

tasawwur mein kiya karte hain jo hum

wo taswir-e-KHayal-e-yar se puchh

mata-e-be-baha hai sher-e-'haali'

meri qimat meri guftar se puchh