haqiqaton ko fasana bana ke bhul gaya

haqīqatoñ ko fasāna banā ke bhuul gayā

maiñ tere ishq kī har choT khā ke bhuul gayā

zarā ye dūrī-e-ehsās-e-husn-o-ishq to dekh

ki maiñ tujhe tire nazdīk aa ke bhuul gayā

ab us se baḌh ke bhī vāraftagī-e-dil kyā ho

ki tujh ko ziist kā hāsil banā ke bhuul gayā

gumān jis pe rahā manziloñ kā ik muddat

vo rahguzār bhī manzil meñ aa ke bhuul gayā

ab aisī hairat-o-vāraftagī ko kyā kahiye

duā ko haath uThā.e uThā ke bhuul gayā

dil-o-jigar haiñ ki garmī se pighle jaate haiñ

koī charāġh-e-tamannā jalā ke bhuul gayā

haqiqaton ko fasana bana ke bhul gaya

main tere ishq ki har choT kha ke bhul gaya

zara ye duri-e-ehsas-e-husn-o-ishq to dekh

ki main tujhe tere nazdik aa ke bhul gaya

ab us se baDh ke bhi waraftagi-e-dil kya ho

ki tujh ko zist ka hasil bana ke bhul gaya

guman jis pe raha manzilon ka ek muddat

wo rahguzar bhi manzil mein aa ke bhul gaya

ab aisi hairat-o-waraftagi ko kya kahiye

dua ko hath uThae uTha ke bhul gaya

dil-o-jigar hain ki garmi se pighle jate hain

koi charagh-e-tamanna jala ke bhul gaya