har aah-e-sard ishq hai har wah ishq hai

har āh-e-sard ishq hai har vaah ishq hai

hotī hai jo bhī jur.at-e-nigāh ishq hai

darbān ban ke sar ko jhukā.e khaḌī hai aql

darbār-e-dil ki jis kā shahanshāh ishq hai

sun ai ġhurūr-e-husn tirā tazkira hai kyā

asrār-e-kā.enāt se āgāh ishq hai

jabbār bhī rahīm bhī qahhār bhī vahī

saare usī ke naam haiñ allāh ishq hai

mehnat kā phal hai sadqa-o-ḳhairāt kyuuñ kaheñ

jiine kī ham jo paate haiñ tanḳhvāh ishq hai

chehre faqat paḌāv haiñ manzil nahīñ tirī

ai kārvān-e-ishq tirī raah ishq hai

aise haiñ ham to koī hamārī ḳhatā nahīñ

lillāh ishq hai hameñ vallāh ishq hai

hoñ vo 'amīr-imām' ki farhād-o-qais hoñ

aao ki har shahīd kī dargāh ishq hai

har aah-e-sard ishq hai har wah ishq hai

hoti hai jo bhi jurat-e-nigah ishq hai

darban ban ke sar ko jhukae khaDi hai aql

darbar-e-dil ki jis ka shahanshah ishq hai

sun ai ghurur-e-husn tera tazkira hai kya

asrar-e-kaenat se aagah ishq hai

jabbar bhi rahim bhi qahhaar bhi wahi

sare usi ke nam hain allah ishq hai

mehnat ka phal hai sadqa-o-KHairaat kyun kahen

jine ki hum jo pate hain tanKHwah ishq hai

chehre faqat paDaw hain manzil nahin teri

ai karwan-e-ishq teri rah ishq hai

aise hain hum to koi hamari KHata nahin

lillah ishq hai hamein wallah ishq hai

hon wo 'amir-imam' ki farhad-o-qais hon

aao ki har shahid ki dargah ishq hai