har aah gham-e-dil ki ghammaz nahin hoti

har aah ġham-e-dil kī ġhammāz nahīñ hotī

aur vaah masarrat kā āġhāz nahīñ hotī

jo rok nahīñ paatī ashkoñ kī ravānī ko

vo aañkh ġham-e-dil kī hamrāz nahīñ hotī

har ashk-e-shahanshāhī ik taaj nahīñ bantā

har malka zamāne meñ 'mumtāz' nahīñ hotī

miltī hai ḳhamoshī se zālim ko sazā yaaro

allāh kī lāThī meñ āvāz nahīñ hotī

ik Thos haqīqat hai alfāz ke paikar meñ

ye shā.irī shā.ir kā e.ajāz nahīñ hotī

yuuñ umr kī qaiñchī ne par mere katar Daale

ab laakh karūñ koshish parvāz nahīñ hotī

daulat kī badaulat jo bandhtī hai 'asad' sar par

dastār-e-fazīlat vo e.azāz nahīñ hotī

har aah gham-e-dil ki ghammaz nahin hoti

aur wah masarrat ka aaghaz nahin hoti

jo rok nahin pati ashkon ki rawani ko

wo aankh gham-e-dil ki hamraaz nahin hoti

har ashk-e-shahanshahi ek taj nahin banta

har malka zamane mein 'mumtaz' nahin hoti

milti hai KHamoshi se zalim ko saza yaro

allah ki laThi mein aawaz nahin hoti

ek Thos haqiqat hai alfaz ke paikar mein

ye shairi shair ka eajaz nahin hoti

yun umr ki qainchi ne par mere katar Dale

ab lakh karun koshish parwaz nahin hoti

daulat ki badaulat jo bandhti hai 'asad' sar par

dastar-e-fazilat wo eazaz nahin hoti