har aashna mein kahan KHu-e-mehrmana wo

har āshnā meñ kahāñ ḳhū-e-mehrmāna vo

ki bevafā thā magar dost thā purānā vo

pukārte haiñ mah-o-sāl manziloñ kī tarah

lagā hai tausn-e-hastī ko tāziyāna vo

hameñ bhī ġham-talabī kā nahīñ rahā yaarā

tire bhī rañg nahīñ gardish-e-zamāna vo

ab apnī ḳhvāhisheñ kyā kyā use rulātī haiñ

ye baat ham ne kahī thī magar na maanā vo

yahī kaheñge ki bas sūrat-āshnā.ī thī

jo ahd TuuT chukā yaad kyā dilānā vo

is ek shakl meñ kyā kyā na sūrateñ dekhīñ

nigār thā nazar aayā nigār-ḳhāna vo

bujhā diyā hai tujhe bhī 'farāz' duniyā ne

kahāñ gayā tirā har vaqt muskurānā vo

har aashna mein kahan KHu-e-mehrmana wo

ki bewafa tha magar dost tha purana wo

pukarte hain mah-o-sal manzilon ki tarah

laga hai tausn-e-hasti ko taziyana wo

hamein bhi gham-talabi ka nahin raha yara

tere bhi rang nahin gardish-e-zamana wo

ab apni KHwahishen kya kya use rulati hain

ye baat hum ne kahi thi magar na mana wo

yahi kahenge ki bas surat-ashnai thi

jo ahd TuT chuka yaad kya dilana wo

is ek shakl mein kya kya na suraten dekhin

nigar tha nazar aaya nigar-KHana wo

bujha diya hai tujhe bhi 'faraaz' duniya ne

kahan gaya tera har waqt muskurana wo