har aks KHud ek aaina hai

har aks ḳhud ek aa.ina hai

har saaya zabāñ se boltā hai

ehsās kī talḳhiyoñ meñ Dhal kar

dil dard kā chāñd ban gayā hai

suntā ho koī to har kalī ke

khilne meñ shikast kī sadā hai

yuuñ aatī hai terī yaad ab to

jaise koī duur kī sadā hai

goyā the to koī bhī nahīñ thā

ab chup haiñ to shahr dekhtā hai

aajiz hai ajal bhī us ke aage

jo misl-e-sabā bikhar gayā hai

tū silsila-e-savāl ban kar

kyuuñ zehnoñ ke ban meñ gūñjtā hai

qurbat tirī kis ko raas aa.ī

ā.īne meñ aks kāñptā hai

jiite haiñ ravāyatan 'razā' ham

is daur meñ zindagī sazā hai

har aks KHud ek aaina hai

har saya zaban se bolta hai

ehsas ki talKHiyon mein Dhal kar

dil dard ka chand ban gaya hai

sunta ho koi to har kali ke

khilne mein shikast ki sada hai

yun aati hai teri yaad ab to

jaise koi dur ki sada hai

goya the to koi bhi nahin tha

ab chup hain to shahr dekhta hai

aajiz hai ajal bhi us ke aage

jo misl-e-saba bikhar gaya hai

tu silsila-e-sawal ban kar

kyun zehnon ke ban mein gunjta hai

qurbat teri kis ko ras aai

aaine mein aks kanpta hai

jite hain rawayatan 'raza' hum

is daur mein zindagi saza hai