har baat jo na hona thi aisi hui ki bas

har baat jo na honā thī aisī huī ki bas

kuchh aur chāhiye tujhe ai zindagī ki bas

jo din nahīñ guzarnā the vo bhī guzar ga.e

duniyā hai ham haiñ aur hai vo bebasī ki bas

jin par nisār naqd-e-sukūñ naqd-e-jāñ kiyā

un se mile to aisī nadāmat huī ki bas

maiñ jis ko dekhtā thā uchaTtī nigāh se

un kī nigāh mujh pe kuchh aisī paḌī ki bas

manzil samajh ke daar pe maiñ to na ruk sakā

ḳhud mujh se merī zindagī kahtī rahī ki bas

vo mas.ale hayāt ke jo mas.ale nahīñ

un mas.aloñ se uljhā hai yuuñ aadmī ki bas

pahuñchā jahāñ bhī log ye kahte hue mile

tahzīb apne shahr kī aisī miTī ki bas

duniyā ġharīb jaan ke hañstī thī 'mīr' par

'iqbāl' mujh pe aise ye duniyā hañsī ki bas

har baat jo na hona thi aisi hui ki bas

kuchh aur chahiye tujhe ai zindagi ki bas

jo din nahin guzarna the wo bhi guzar gae

duniya hai hum hain aur hai wo bebasi ki bas

jin par nisar naqd-e-sukun naqd-e-jaan kiya

un se mile to aisi nadamat hui ki bas

main jis ko dekhta tha uchaTti nigah se

un ki nigah mujh pe kuchh aisi paDi ki bas

manzil samajh ke dar pe main to na ruk saka

KHud mujh se meri zindagi kahti rahi ki bas

wo masale hayat ke jo masale nahin

un masalon se uljha hai yun aadmi ki bas

pahuncha jahan bhi log ye kahte hue mile

tahzib apne shahr ki aisi miTi ki bas

duniya gharib jaan ke hansti thi 'mir' par

'iqbaal' mujh pe aise ye duniya hansi ki bas