ہر چند اپنا حال نہ ہم سے بیاں ہوا

ہر چند اپنا حال نہ ہم سے بیاں ہوا

یہ حرف بے وجود مگر داستاں ہوا

مانا کہ ہم پہ آج کوئی مہرباں ہوا

دل کانپتا ہے یہ بھی اگر امتحاں ہوا

جو کچھ میں کہہ چکا ہوں ذرا اس پہ غور کر

جو کچھ بیاں ہوا ہے بہ مشکل بیاں ہوا

اب تم کو جس خلوص کی ہم سے امید ہے

مدت ہوئی وہ نذر دل دوستاں ہوا

طوفان زندگی میں ضرورت تھی جب تری

مجھ کو ہر ایک موج پہ تیرا گماں ہوا

آداب قید و بند نے بدلا عجیب رنگ

کنج قفس کا نام بھی اب آشیاں ہوا

آنسو نکل پڑے ہیں خوشی میں ترے حضور

کس تمکنت کے ساتھ یہ دریا رواں ہوا