har-chand ki wo jawan nahin hum

har-chand ki vo javāñ nahīñ ham

itne bhī to nā-tavāñ nahīñ ham

qīmat hai hamārī ik tabassum

is nirḳh pe kuchh girāñ nahīñ ham

haiñ kunj-e-qafas ke rahne vaale

parvarda-e-āshiyāñ nahīñ ham

kyuuñ dar pe raheñ hamesha baiThe

kuchh aap ke pāsbāñ nahīñ ham

tasvīr kisī kī dekhte haiñ

mahv-e-gul-o-bostāñ nahīñ ham

gar aañkh zarā bhī tū ne pherī

to gardish-e-āsmāñ nahīñ ham

hāthoñ se tire bahār-e-ḳhūbī

sharminda-e-barg-e-pāñ nahīñ ham

tum tak bhī pahuñch raheñge āḳhir

kuchh duur to ham-rahāñ nahīñ ham

kis roz jarāhatoñ pe dil kī

ashkoñ se namak-fishāñ nahīñ ham

majlis se kare hai ham ko bāhar

goyā ki mizāj-dāñ nahīñ ham

saa.e se hamāre itnī nafrat

kāfir bhī to ai butāñ nahīñ ham

hai chaar taraf hamārā jalva

DhūñDe jo koī kahāñ nahīñ ham

ya.anī ki barañg-e-nik.hat-e-gul

parde meñ haiñ aur nihāñ nahīñ ham

miltā hai har ik se 'mus.hafī' yaar

samjhe hai ki bad-gumāñ nahīñ ham

har-chand ki wo jawan nahin hum

itne bhi to na-tawan nahin hum

qimat hai hamari ek tabassum

is nirKH pe kuchh giran nahin hum

hain kunj-e-qafas ke rahne wale

parwarda-e-ashiyan nahin hum

kyun dar pe rahen hamesha baiThe

kuchh aap ke pasban nahin hum

taswir kisi ki dekhte hain

mahw-e-gul-o-bostan nahin hum

gar aankh zara bhi tu ne pheri

to gardish-e-asman nahin hum

hathon se tere bahaar-e-KHubi

sharminda-e-barg-e-pan nahin hum

tum tak bhi pahunch rahenge aaKHir

kuchh dur to ham-rahan nahin hum

kis roz jarahaton pe dil ki

ashkon se namak-fishan nahin hum

majlis se kare hai hum ko bahar

goya ki mizaj-dan nahin hum

sae se hamare itni nafrat

kafir bhi to ai butan nahin hum

hai chaar taraf hamara jalwa

DhunDe jo koi kahan nahin hum

yani ki barang-e-nikhat-e-gul

parde mein hain aur nihan nahin hum

milta hai har ek se 'mushafi' yar

samjhe hai ki bad-guman nahin hum