har-chand mera gham gham-e-nadida raha hai

har-chand mirā ġham ġham-e-nādīda rahā hai

saaya sā magar ruuh pe larzīda rahā hai

chubhte hī rahe ḳhār-e-alam dast-e-talab meñ

rāhat vo gul-e-jāñ hai ki nā-chīda rahā hai

Duube haiñ yahāñ kitnī umañgoñ ke safīne

tūfān kā maskan dil-e-shorīda rahā hai

bāzīcha-e-firdaus se kyā bahlegā vo dil

me.arāj-e-tarab par bhī jo ranjīda rahā hai

ai manzil-e-nau-yāfta maiñ tere nishāñ tak

jis raste se pahuñchā huuñ vo pechīda rahā hai

tashvīsh ke in ramnoñ se guzrā huuñ akelā

ehsās jahāñ ḳhauf se ram-dīda rahā hai

kaaTe haiñ vo sahrā-e-tamannā tan-e-tanhā

'ārif' bhī jahāñ nazroñ se poshīda rahā hai

taskīn ke bahrūp meñ ab jaagā hai vo hashr

barsoñ mire pahlū meñ jo ḳhvābīda rahā hai

har-chand mera gham gham-e-nadida raha hai

saya sa magar ruh pe larzida raha hai

chubhte hi rahe KHar-e-alam dast-e-talab mein

rahat wo gul-e-jaan hai ki na-chida raha hai

Dube hain yahan kitni umangon ke safine

tufan ka maskan dil-e-shorida raha hai

bazicha-e-firdaus se kya bahlega wo dil

mearaj-e-tarab par bhi jo ranjida raha hai

ai manzil-e-nau-yafta main tere nishan tak

jis raste se pahuncha hun wo pechida raha hai

tashwish ke in ramnon se guzra hun akela

ehsas jahan KHauf se ram-dida raha hai

kaTe hain wo sahra-e-tamanna tan-e-tanha

'arif' bhi jahan nazron se poshida raha hai

taskin ke bahrup mein ab jaga hai wo hashr

barson mere pahlu mein jo KHwabida raha hai