har-chand tere gham ka sahaara bhi nahin hai

har-chand tire ġham kā sahārā bhī nahīñ hai

jiine ke alāva koī chāra bhī nahīñ hai

har roz kiye jaatī hai ye ziist taqāze

kyā qarz thā jo ham ne utārā bhī nahīñ hai

pahle to ye maujeñ bhī himāyat meñ khaḌī thiiñ

ab merā madad-gār kināra bhī nahīñ hai

jaatā bhī nahīñ chhoḌ ke vo mujh ko akelā

aur saath mirā us ko gavāra bhī nahīñ hai

kuchh apne muqaddar ko bigāḌā bhī hamīñ ne

kuchh apne muāfiq ye sitāra bhī nahīñ hai

hotī thī jise dekh ke sarshār tabī.at

āñkhoñ meñ vo sarsabz nazāra bhī nahīñ hai

ye baat alag jiit ke āsār nahīñ haiñ

is mārka-e-jāñ ko vo haarā bhī nahīñ hai

har koī 'salīm' us kā muḳhālif hai jahāñ meñ

aur koī ḳhilāf us ke saf-ārā bhī nahīñ hai

har-chand tere gham ka sahaara bhi nahin hai

jine ke alawa koi chaara bhi nahin hai

har roz kiye jati hai ye zist taqaze

kya qarz tha jo hum ne utara bhi nahin hai

pahle to ye maujen bhi himayat mein khaDi thin

ab mera madad-gar kinara bhi nahin hai

jata bhi nahin chhoD ke wo mujh ko akela

aur sath mera us ko gawara bhi nahin hai

kuchh apne muqaddar ko bigaDa bhi hamin ne

kuchh apne muafiq ye sitara bhi nahin hai

hoti thi jise dekh ke sarshaar tabiat

aankhon mein wo sarsabz nazara bhi nahin hai

ye baat alag jit ke aasar nahin hain

is marka-e-jaan ko wo haara bhi nahin hai

har koi 'salim' us ka muKHalif hai jahan mein

aur koi KHilaf us ke saf-ara bhi nahin hai