har chand zulmaton ke hawale bahut mile

har chand zulmatoñ ke havāle bahut mile

raste meñ mujh ko phir bhī ujāle bahut mile

insāniyat kā kaun hai qātil pata to hai

lekin sabhī zabānoñ pe taale bahut mile

jazbāt-e-dil ne 'azm ko maġhlūb kar diyā

manzil milī to paañv meñ chhāle bahut mile

lagtā hai in saroñ pe hai ik bojh qarz kā

hāthoñ meñ thartharāte nivāle bahut mile

dil ko ġham-e-husain kā pāband kar diyā

is dil meñ mujh ko karbalā vaale bahut mile

koī bhī dard bāñTne vaalā nahīñ milā

haañ facebōk pe chāhne vaale bahut mile

'ātish' sunī hai ahl-e-siyāsat kī guftugū

sachchā.iyoñ meñ mirch masāle bahut mile

har chand zulmaton ke hawale bahut mile

raste mein mujh ko phir bhi ujale bahut mile

insaniyat ka kaun hai qatil pata to hai

lekin sabhi zabanon pe tale bahut mile

jazbaat-e-dil ne 'azm ko maghlub kar diya

manzil mili to panw mein chhaale bahut mile

lagta hai in saron pe hai ek bojh qarz ka

hathon mein thartharaate niwale bahut mile

dil ko gham-e-husain ka paband kar diya

is dil mein mujh ko karbala wale bahut mile

koi bhi dard banTne wala nahin mila

han facebook pe chahne wale bahut mile

'atish' suni hai ahl-e-siyasat ki guftugu

sachchaiyon mein mirch masale bahut mile