har dam duaen dena har lahza aahen bharna

har dam duā.eñ denā har lahza aaheñ bharnā

un kā bhī kaam karnā apnā bhī kaam karnā

haañ kis ko hai mayassar ye kaam kar guzarnā

ik bāñkpan se jiinā ik bāñkpan se marnā

jo ziist ko na samjheñ jo maut ko na jāneñ

jiinā unhīñ kā jiinā marnā unhīñ kā marnā

terī ināyatoñ se mujh ko bhī aa chalā hai

terī himāyatoñ meñ har har qadam guzarnā

sāhil ke lab se pūchho dariyā ke dil se pūchho

ik mauj-e-tah-nashīñ kā muddat ke baad ubharnā

ai shauq tere sadqe pahuñchā diyā kahāñ tak

ai ishq tere qurbāñ jiinā hai ab na marnā

har zarra aah jis kā labrez-e-tishnagī hai

us ḳhaak kī bhī jānib ai abr-e-tar guzarnā

dariyā kī zindagī par sadqe hazār jāneñ

mujh ko nahīñ gavārā sāhil kī maut marnā

rañgīniyāñ nahīñ to ra.anā.iyāñ bhī kaisī

shabnam sī nāznīñ ko aatā nahīñ sañvarnā

ashkoñ ko bhī ye jur.at allāh rī terī qudrat

āñkhoñ tak aate aate phir dil meñ jā Thaharnā

ai jān-e-nāz aa jā āñkhoñ kī raah dil meñ

in ḳhushk naddiyoñ se mushkil ho kyā guzarnā

ham be-ḳhudān-e-ġham se ye raaz koī sīkhe

jiinā magar na jiinā marnā magar na marnā

kuchh aa chalī hai aahaT us pā-e-nāz kī sī

tujh par ḳhudā kī rahmat ai dil zarā Thaharnā

ḳhūn-e-jigar kā hāsil ik sher-e-tar kī sūrat

apnā hī aks jis meñ apnā hai rang bharnā

har dam duaen dena har lahza aahen bharna

un ka bhi kaam karna apna bhi kaam karna

han kis ko hai mayassar ye kaam kar guzarna

ek bankpan se jina ek bankpan se marna

jo zist ko na samjhen jo maut ko na jaanen

jina unhin ka jina marna unhin ka marna

teri inayaton se mujh ko bhi aa chala hai

teri himayaton mein har har qadam guzarna

sahil ke lab se puchho dariya ke dil se puchho

ek mauj-e-tah-nashin ka muddat ke baad ubharna

ai shauq tere sadqe pahuncha diya kahan tak

ai ishq tere qurban jina hai ab na marna

har zarra aah jis ka labrez-e-tishnagi hai

us KHak ki bhi jaanib ai abr-e-tar guzarna

dariya ki zindagi par sadqe hazar jaanen

mujh ko nahin gawara sahil ki maut marna

ranginiyan nahin to ranaiyan bhi kaisi

shabnam si naznin ko aata nahin sanwarna

ashkon ko bhi ye jurat allah ri teri qudrat

aankhon tak aate aate phir dil mein ja Thaharna

ai jaan-e-naz aa ja aankhon ki rah dil mein

in KHushk naddiyon se mushkil ho kya guzarna

hum be-KHudan-e-gham se ye raaz koi sikhe

jina magar na jina marna magar na marna

kuchh aa chali hai aahaT us pa-e-naz ki si

tujh par KHuda ki rahmat ai dil zara Thaharna

KHun-e-jigar ka hasil ek sher-e-tar ki surat

apna hi aks jis mein apna hai rang bharna