har ehtimam hai do din ki zindagi ke liye

har ehtimām hai do din kī zindagī ke liye

sukūn-e-qalb nahīñ phir bhī aadmī ke liye

tamām umr ḳhushī kī talāsh meñ guzrī

tamām umr taraste rahe ḳhushī ke liye

na khā fareb vafā kā ye bevafā duniyā

kabhī kisī ke liye hai kabhī kisī ke liye

ye daur-e-shams-o-qamar ye faroġh-e-ilm-o-hunar

zamīn phir bhī tarastī hai raushnī ke liye

kabhī uThe the jo ḳhurshīd-e-zindagī ban kar

taras rahe haiñ vo tāroñ kī raushnī ke liye

sitam-tarāzi-e-daur-e-ḳhirad ḳhudā kī panāh

ki aadmī hī musībat hai aadmī ke liye

rah-e-hayāt kī tārīkiyoñ meñ ai 'zāhid'

charāġh-e-dil hai mire paas raushnī ke liye

har ehtimam hai do din ki zindagi ke liye

sukun-e-qalb nahin phir bhi aadmi ke liye

tamam umr KHushi ki talash mein guzri

tamam umr taraste rahe KHushi ke liye

na kha fareb wafa ka ye bewafa duniya

kabhi kisi ke liye hai kabhi kisi ke liye

ye daur-e-shams-o-qamar ye farogh-e-ilm-o-hunar

zamin phir bhi tarasti hai raushni ke liye

kabhi uThe the jo KHurshid-e-zindagi ban kar

taras rahe hain wo taron ki raushni ke liye

sitam-taraazi-e-daur-e-KHirad KHuda ki panah

ki aadmi hi musibat hai aadmi ke liye

rah-e-hayat ki tarikiyon mein ai 'zahid'

charagh-e-dil hai mere pas raushni ke liye