har ek baat teri be-sabaat kitni hai

har ek baat tirī be-sabāt kitnī hai

palaTnā baat ko dam bhar meñ baat kitnī hai

abhī to shaam huī hai abhī to aa.e ho

abhī se pūchh rahe ho ki raat kitnī hai

vo sunte sunte jo ghabrā.e hāl-e-dil bole

bayān kitnī huī vārdāt kitnī hai

tire shahīd ko dūlhā banā huā dekhā

ravāñ janāze ke pīchhe barāt kitnī hai

kisī tarah nahīñ kaTtī nahīñ guzar chuktī

ilāhī saḳht ye qaid-e-hayāt kitnī hai

hamārī jaan hai qīmat to dil hai bai.āna

girāñ-bahā lab-e-nāzuk kī baat kitnī hai

jo shab ko khilte haiñ ġhunche vo din ko jhaḌte haiñ

bahār-e-bāġh-e-jahāñ be-sabāt kitnī hai

mahīnoñ ho ga.e dekhī nahīñ hai sub.h-e-ummīd

kise ḳhabar ye musībat kī raat kitnī hai

udū ke sāmne ye dekhnā hai ham ko bhī

kidhar ko hai nigah-e-iltifāt kitnī hai

ġhazal likheñ bhī to kyā ḳhaak ham likheñ 'beḳhud'

zamīn dekhiye ye vāhiyāt kitnī hai

har ek baat teri be-sabaat kitni hai

palaTna baat ko dam bhar mein baat kitni hai

abhi to sham hui hai abhi to aae ho

abhi se puchh rahe ho ki raat kitni hai

wo sunte sunte jo ghabrae haal-e-dil bole

bayan kitni hui wardat kitni hai

tere shahid ko dulha bana hua dekha

rawan janaze ke pichhe baraat kitni hai

kisi tarah nahin kaTti nahin guzar chukti

ilahi saKHt ye qaid-e-hayat kitni hai

hamari jaan hai qimat to dil hai baiana

giran-baha lab-e-nazuk ki baat kitni hai

jo shab ko khilte hain ghunche wo din ko jhaDte hain

bahaar-e-bagh-e-jahan be-sabaat kitni hai

mahinon ho gae dekhi nahin hai subh-e-ummid

kise KHabar ye musibat ki raat kitni hai

udu ke samne ye dekhna hai hum ko bhi

kidhar ko hai nigah-e-iltifat kitni hai

ghazal likhen bhi to kya KHak hum likhen 'beKHud'

zamin dekhiye ye wahiyat kitni hai