har ek ki har pasand Thahre har ek ka intiKHab nikle

har ek kī har pasand Thahre har ek kā intiḳhāb nikle

hamī ko achchhā batāyā sab ne hamī ziyāda ḳharāb nikle

savāl thā is taraf anā kā vaqār kā mas.ala udhar thā

na dar pe ḳhāna-ḳharāb pahuñche na ghar se ālī-janāb nikle

ka.ī adāoñ ne gudgudāyā ka.ī nigāhoñ ne dastakeñ diiñ

ye vāqiye dil-nashīñ bahut the magar haqīqat meñ ḳhvāb nikle

sunī añdheroñ kī sugbugāhaT to shaam yādoñ kī kahkashāñ se

chhupe hue māhtāb nikle bujhe hue āftāb nikle

maiñ mutma.in huuñ ki lab-kushā.ī se maiñ ne had-e-adab na toḌī

vo is pe ḳhush hai ki aaj us ke savāl sab lā-javāb nikle

har ek ki har pasand Thahre har ek ka intiKHab nikle

hami ko achchha bataya sab ne hami ziyaada KHarab nikle

sawal tha is taraf ana ka waqar ka masala udhar tha

na dar pe KHana-KHarab pahunche na ghar se aali-janab nikle

kai adaon ne gudgudaya kai nigahon ne dastaken din

ye waqiye dil-nashin bahut the magar haqiqat mein KHwab nikle

suni andheron ki sugbugahaT to sham yaadon ki kahkashan se

chhupe hue mahtab nikle bujhe hue aaftab nikle

main mutmain hun ki lab-kushai se main ne had-e-adab na toDi

wo is pe KHush hai ki aaj us ke sawal sab la-jawab nikle