har ek phul ke daman mein Khaar kaisa hai

har ek phuul ke dāman meñ ḳhaar kaisā hai

batā.e kaun ki rañg-e-bahār kaisā hai

vo sāmne the to dil ko sukūñ na thā hāsil

chale ga.e haiñ to ab be-qarār kaisā hai

yaqīn thā ki na aa.egā mujh se milne koī

to phir ye dil ko mire intizār kaisā hai

agar kisī ne tumhārā bhī dil nahīñ toḌā

to āñsuoñ kā ravāñ ābshār kaisā hai

mujhe ḳhabar hai ki hai be-vafā bhī zālim bhī

magar vafā kā tirī e'tibār kaisā hai

tire makān kī dīvār par jo hai chaspāñ

talāsh kis kī hai ye ishtihār kaisā hai

ye kis ke ḳhuun se hai dāman-e-chaman rañgīñ

ye surḳh phuul sar-e-shāḳh-dār kaisā hai

ab un kī barq-e-nazar ko dikhāo ā.īna

vo pūchhte haiñ dil-e-be-qarār kaisā hai

mirī ḳhabar to kisī ko nahīñ magar 'aḳhtar'

zamāna apne liye hoshiyār kaisā hai

har ek phul ke daman mein KHar kaisa hai

batae kaun ki rang-e-bahaar kaisa hai

wo samne the to dil ko sukun na tha hasil

chale gae hain to ab be-qarar kaisa hai

yaqin tha ki na aaega mujh se milne koi

to phir ye dil ko mere intizar kaisa hai

agar kisi ne tumhaara bhi dil nahin toDa

to aansuon ka rawan aabshaar kaisa hai

mujhe KHabar hai ki hai be-wafa bhi zalim bhi

magar wafa ka teri e'tibar kaisa hai

tere makan ki diwar par jo hai chaspan

talash kis ki hai ye ishtihaar kaisa hai

ye kis ke KHun se hai daman-e-chaman rangin

ye surKH phul sar-e-shaKH-dar kaisa hai

ab un ki barq-e-nazar ko dikhao aaina

wo puchhte hain dil-e-be-qarar kaisa hai

meri KHabar to kisi ko nahin magar 'aKHtar'

zamana apne liye hoshiyar kaisa hai