har ek sans ke pichhe koi bala hi na ho

har ek saañs ke pīchhe koī balā hī na ho

maiñ jī rahā huuñ to jiinā mirī sazā hī na ho

jo ibtidā hai kisī intihā meñ zam to nahīñ

jo intihā hai kahīñ vo bhī ibtidā hī na ho

mirī sadā.eñ mujhī meñ palaT ke aatī haiñ

vo mere gumbad-e-be-dar meñ gūñjtā hī na ho

bujhā rakhe haiñ ye kis ne sabhī charāġh-e-havas

zarā sā jhāñk ke dekheñ kahīñ havā hī na ho

ajab nahīñ ki ho us āstāñ pe jamm-e-ġhafīr

aur us ko mere sivā koī dekhtā hī na ho

vo DhūñD DhūñD ke ro ro paḌe hamāre liye

so duur duur tak apnā atā-patā hī na ho

har ek sans ke pichhe koi bala hi na ho

main ji raha hun to jina meri saza hi na ho

jo ibtida hai kisi intiha mein zam to nahin

jo intiha hai kahin wo bhi ibtida hi na ho

meri sadaen mujhi mein palaT ke aati hain

wo mere gumbad-e-be-dar mein gunjta hi na ho

bujha rakhe hain ye kis ne sabhi charagh-e-hawas

zara sa jhank ke dekhen kahin hawa hi na ho

ajab nahin ki ho us aastan pe jamm-e-ghafir

aur us ko mere siwa koi dekhta hi na ho

wo DhunD DhunD ke ro ro paDe hamare liye

so dur dur tak apna ata-pata hi na ho