har ek sawal ka dete hain kyun jawab ghalat

har ek savāl kā dete haiñ kyuuñ javāb ġhalat

paḌhā hai bachchoñ ne shāyad sabhī nisāb ġhalat

hamāre ahd-e-vafā kā kahīñ bhī zikr nahīñ

mo.arriḳhoñ ne likhe ab ke saare baab ġhalat

tanābeñ TuuT ke bikhrīñ tamām ḳhemoñ kī

havā ke ruḳh kā lagāyā gayā hisāb ġhalat

ḳhayāl-e-shauq kī be-chehragī pe kyā ro.eñ

diloñ meñ ham ne basā.e the saare ḳhvāb ġhalat

ibādatoñ ke marātib buland hoñ kaise

tire amal meñ gunā kā hai irtikāb ġhalat

ham ehtisāb-e-amal se gurez-pā hī rahe

na vo ġhalat hai na us kā koī itaab ġhalat

dil-o-dimāġh kī bastī ujaḌ bhī saktī hai

paḌhe jo aañkh hamārī koī kitāb ġhalat

masāfatoñ ke kaḌe kos sahl kyā hoñge

agar safar meñ mile koī ham-rikāb ġhalat

har ek sawal ka dete hain kyun jawab ghalat

paDha hai bachchon ne shayad sabhi nisab ghalat

hamare ahd-e-wafa ka kahin bhi zikr nahin

moarriKHon ne likhe ab ke sare bab ghalat

tanaben TuT ke bikhrin tamam KHemon ki

hawa ke ruKH ka lagaya gaya hisab ghalat

KHayal-e-shauq ki be-chehragi pe kya roen

dilon mein hum ne basae the sare KHwab ghalat

ibaadaton ke maraatib buland hon kaise

tere amal mein guna ka hai irtikab ghalat

hum ehtisab-e-amal se gurez-pa hi rahe

na wo ghalat hai na us ka koi itab ghalat

dil-o-dimagh ki basti ujaD bhi sakti hai

paDhe jo aankh hamari koi kitab ghalat

masafaton ke kaDe kos sahl kya honge

agar safar mein mile koi ham-rikab ghalat