har ek shaKHs ko dushman agar banaoge

har ek shaḳhs ko dushman agar banāoge

mizāj pūchhne vaalā kahāñ se lāoge

jo sab ko apne hī me.aar par parakhte rahe

to zindagī meñ kise ham-safar banāoge

yahāñ to har koī chehre pe chehre rakhtā hai

uThā ke pahlū se kis ko kise biThāoge

tumheñ usuul tumhāre hī maar Dāleñge

na apne aap ko in se agar bachāoge

charāġh jalne lageñge tumhārī rāhoñ meñ

jo dūsroñ ke gharoñ meñ diye jalāo.ge

ye ahd tum se agar ho sake to kar lenā

hamāre ba.ad kisī kā na dil dikhāoge

nahīñ jhukoge agar ik ḳhudā ke aage tum

na jaane kitne daroñ par ye sar jhukāoge

vo tum se ruuTh ga.ī jo makāñ kī raunaq thī

ġharīb-ḳhāne ko ab kis liye sajāoge

supurd-e-ḳhāk to kar aa.e maañ ko tum 'at.har'

ġhamoñ kī dhuup meñ saaya kahāñ se pāoge

ye be-hisoñ kī hai bastī to phir 'shakīl' yahāñ

sadāqatoñ kā kise aa.ina dikhāoge

har ek shaKHs ko dushman agar banaoge

mizaj puchhne wala kahan se laoge

jo sab ko apne hi mear par parakhte rahe

to zindagi mein kise ham-safar banaoge

yahan to har koi chehre pe chehre rakhta hai

uTha ke pahlu se kis ko kise biThaoge

tumhein usul tumhaare hi mar Dalenge

na apne aap ko in se agar bachaoge

charagh jalne lagenge tumhaari rahon mein

jo dusron ke gharon mein diye jalaoge

ye ahd tum se agar ho sake to kar lena

hamare baad kisi ka na dil dikhaoge

nahin jhukoge agar ek KHuda ke aage tum

na jaane kitne daron par ye sar jhukaoge

wo tum se ruTh gai jo makan ki raunaq thi

gharib-KHane ko ab kis liye sajaoge

supurd-e-KHak to kar aae man ko tum 'athar'

ghamon ki dhup mein saya kahan se paoge

ye be-hison ki hai basti to phir 'shakil' yahan

sadaqaton ka kise aaina dikhaoge