har ek hazar mein bas panch sat hain hum log

har ik hazār meñ bas pāñch saat haiñ ham log

nisāb-e-ishq pe vājib zakāt haiñ ham log

dabāo meñ bhī jamā.at kabhī nahīñ badlī

shurūa din se mohabbat ke saath haiñ ham log

jo sīkhnī ho zabān-e-sukūt bismillāh

ḳhamoshiyoñ kī mukammal luġhāt haiñ ham log

kahāniyoñ ke vo kirdār jo likhe na ga.e

ḳhabar se hazf-shuda vāqi.āt haiñ ham log

ye intizār hameñ dekh kar banāyā gayā

zuhūr-e-hijr se pahle kī baat haiñ ham log

kisī ko rāsta de deñ kisī ko paanī na deñ

kahīñ pe niil kahīñ par furāt haiñ ham log

hameñ jalā ke koī shab guzār saktā hai

saḌak pe bikhre hue kāġhzāt haiñ ham log

har ek hazar mein bas panch sat hain hum log

nisab-e-ishq pe wajib zakat hain hum log

dabao mein bhi jamaat kabhi nahin badli

shurua din se mohabbat ke sath hain hum log

jo sikhni ho zaban-e-sukut bismillah

KHamoshiyon ki mukammal lughat hain hum log

kahaniyon ke wo kirdar jo likhe na gae

KHabar se hazf-shuda waqiat hain hum log

ye intizar hamein dekh kar banaya gaya

zuhur-e-hijr se pahle ki baat hain hum log

kisi ko rasta de den kisi ko pani na den

kahin pe nil kahin par furaat hain hum log

hamein jala ke koi shab guzar sakta hai

saDak pe bikhre hue kaghzat hain hum log