har ek qayas haqiqat se dur-tar nikla

har ik qayās haqīqat se dūr-tar niklā

kitāb kā na koī dars mo'tabar niklā

nafas tamām huā dāstān ḳhatm huī

jo thā tavīl vahī harf muḳhtasar niklā

jo gard saath na uḌtī safar na yuuñ kaTtā

ġhubār-e-rāhguzar mauj-e-bāl-o-par niklā

mujhe bhī kuchh na.e teshe sambhālne hī paḌe

purāne ḳhol ko jab vo bhī toḌ kar niklā

fazā kushāda nahīñ qatl-gāh kī ye kahāñ

mire lahū kā parinda uḌaan par niklā

vo aadmī ki jo mahmil thā āftāboñ kā

ba-qadr-e-yak-do kaf-e-ḳhāk-e-rahguzar niklā

ye raat jis ke liye maiñ ne jaag kar kaaTī

milā vo shaḳhs to ḳhvāboñ kā ham-safar niklā

uḌhā dī chādar-e-ismat ise ḳhayāloñ ne

har ek lafz zabāñ se barahna-sar niklā

'fazā' tum uljhe rahe fikr o falsafe meñ yahāñ

ba-nām-e-ishq vahāñ qur.a-e-hunar niklā

har ek qayas haqiqat se dur-tar nikla

kitab ka na koi dars mo'tabar nikla

nafas tamam hua dastan KHatm hui

jo tha tawil wahi harf muKHtasar nikla

jo gard sath na uDti safar na yun kaTta

ghubar-e-rahguzar mauj-e-baal-o-par nikla

mujhe bhi kuchh nae teshe sambhaalne hi paDe

purane KHol ko jab wo bhi toD kar nikla

faza kushada nahin qatl-gah ki ye kahan

mere lahu ka parinda uDan par nikla

wo aadmi ki jo mahmil tha aaftabon ka

ba-qadr-e-yak-do kaf-e-KHak-e-rahguzar nikla

ye raat jis ke liye main ne jag kar kaTi

mila wo shaKHs to KHwabon ka ham-safar nikla

uDha di chadar-e-ismat ise KHayalon ne

har ek lafz zaban se barahna-sar nikla

'faza' tum uljhe rahe fikr o falsafe mein yahan

ba-nam-e-ishq wahan qura-e-hunar nikla