har ek tahrir nafrat ki miTana chahta hun main

har ik tahrīr nafrat kī miTānā chāhtā huuñ maiñ

mohabbat hī mohabbat kā fasāna chāhtā huuñ maiñ

fasīleñ nafratoñ kī sab girānā chāhtā huuñ maiñ

amīr-e-shahr kā lekin ishāra chāhtā huuñ maiñ

añdherī raat meñ sūraj ugānā chāhtā huuñ maiñ

charāġhoñ meñ lahū apnā jalānā chāhtā huuñ maiñ

falak chhūte makānoñ kī havas tum ko mubārak ho

faqat sar ko chhupāne kā Thikāna chāhtā huuñ maiñ

fasādoñ se kisī bhī qaum ko azmat nahīñ miltī

amīr-e-qaum ko itnā batānā chāhtā huuñ maiñ

na.ī tahzīb kā koī gila-shikva nahīñ mujh ko

magar apne buzurgoñ kā zamāna chāhtā huuñ maiñ

koī sūrat nahīñ hālāt ke tabdīl hone kī

agarche khul ke hañsnā muskurānā chāhtā huuñ maiñ

jahāñ 'ejāz' har chehre pe shādābī nazar aa.e

vahī mausam vahī manzar suhānā chāhtā huuñ maiñ

har ek tahrir nafrat ki miTana chahta hun main

mohabbat hi mohabbat ka fasana chahta hun main

fasilen nafraton ki sab girana chahta hun main

amir-e-shahr ka lekin ishaara chahta hun main

andheri raat mein suraj ugana chahta hun main

charaghon mein lahu apna jalana chahta hun main

falak chhute makanon ki hawas tum ko mubarak ho

faqat sar ko chhupane ka Thikana chahta hun main

fasadon se kisi bhi qaum ko azmat nahin milti

amir-e-qaum ko itna batana chahta hun main

nai tahzib ka koi gila-shikwa nahin mujh ko

magar apne buzurgon ka zamana chahta hun main

koi surat nahin haalat ke tabdil hone ki

agarche khul ke hansna muskurana chahta hun main

jahan 'ejaz' har chehre pe shadabi nazar aae

wahi mausam wahi manzar suhana chahta hun main