har ek yaqin ko dekha guman hote hue

har ik yaqīn ko dekhā gumān hote hue

rahī yuuñ baat adhūrī bayān hote hue

hai merā chāñd mire vāste hī utrā jo

zamīñ pe rahtā hai vo āsmān rahte hue

ab aur kaun sā rahbar dikhā.egā rasta

bhaTak rahe haiñ musalmāñ qur.ān hote hue

vo panchhī yuuñ bhī shikārī kī zad pe aa.egā

sameT le jo paroñ ko uḌaan hote hue

kabhī bhī aañkh meñ rakhnā na rāz-e-dil koī

karegī baat ayaañ be-zabān hote hue

ham āshiqoñ kī ye hujjat ajiib hotī hai

kisī ke pyaar meñ marte haiñ jaan hote hue

bajā rahā hai bahut vaqt ghanTiyāñ 'jauhar'

hamī na sun sakeñ āvāz kaan hote hue

har ek yaqin ko dekha guman hote hue

rahi yun baat adhuri bayan hote hue

hai mera chand mere waste hi utra jo

zamin pe rahta hai wo aasman rahte hue

ab aur kaun sa rahbar dikhaega rasta

bhaTak rahe hain musalman quran hote hue

wo panchhi yun bhi shikari ki zad pe aaega

sameT le jo paron ko uDan hote hue

kabhi bhi aankh mein rakhna na raaz-e-dil koi

karegi baat ayan be-zaban hote hue

hum aashiqon ki ye hujjat ajib hoti hai

kisi ke pyar mein marte hain jaan hote hue

baja raha hai bahut waqt ghanTiyan 'jauhar'

hami na sun saken aawaz kan hote hue