ہر کسی سے ہو دوستی صاحب

ہر کسی سے ہو دوستی صاحب

ایسی کیا بے تکلفی صاحب

شوق تھا دن میں خواب دیکھیں گے

اڑ گئی شب کی نیند بھی صاحب

دھندلے پڑ جائیں گے حسیں چہرے

نہ ہو اتنی بھی روشنی صاحب

شام سے ہی چراغ جلنے لگے

ہے طبیعت بجھی بجھی صاحب

کھا گئی زندگی پرندے کی

ایک بچے کی کنکری صاحب

میں نے ہی رات کے اندھیرے میں

نیکی دریا میں ڈال دی صاحب

رسوا کرتی ہے جابجا اب تو

نامراد اپنی سادگی صاحب

اک فرشتے کو دیکھ کر گھر میں

بچی چھوٹی تھی ڈر گئی صاحب

کرب صدیوں کے چھوڑ جاتی ہے

ایک لمحے کی دوستی صاحب

روز ہم کو بھی ہے کہاں فرصت

ملتے رہیے کبھی کبھی صاحب