har laghzish-e-hayat par itra raha hun main

har laġhzish-e-hayāt par itrā rahā huuñ maiñ

aur be-gunāhiyoñ kī qasam khā rahā huuñ maiñ

nāz-āfrīñ mirā bhī ḳhirām-e-niyāz dekh

mahshar meñ muskurātā huā aa rahā huuñ maiñ

har ashk-e-dil-gudāz mai-nau-kashīda hai

sāġhar se sho.ala ban ke uḌā jā rahā huuñ maiñ

zarb-ul-masal haiñ ab mirī mushkil-pasandiyāñ

suljhā ke har girah ko phir uljhā rahā huuñ maiñ

chaltā hai saath saath zamāne ke kyā karūñ

ruḳh par havā ke bahtā chalā jā rahā huuñ maiñ

sab rishte ab to TuuT chuke sabr-o-zabt ke

añgḌā.iyoñ ko rok uḌā jā rahā huuñ maiñ

hāthoñ se chhūTne ko hai ab dil kā aa.ina

tum to sañvar rahe ho miTā jā rahā huuñ maiñ

kyā fā.eda zamāne se Takrā.ūñ kyuuñ 'sirāj'

ḳhud apne rāste se haTā jā rahā huuñ maiñ

har laghzish-e-hayat par itra raha hun main

aur be-gunahiyon ki qasam kha raha hun main

naz-afrin mera bhi KHiram-e-niyaz dekh

mahshar mein muskuraata hua aa raha hun main

har ashk-e-dil-gudaz mai-nau-kashida hai

saghar se shoala ban ke uDa ja raha hun main

zarb-ul-masal hain ab meri mushkil-pasandiyan

suljha ke har girah ko phir uljha raha hun main

chalta hai sath sath zamane ke kya karun

ruKH par hawa ke bahta chala ja raha hun main

sab rishte ab to TuT chuke sabr-o-zabt ke

angDaiyon ko rok uDa ja raha hun main

hathon se chhuTne ko hai ab dil ka aaina

tum to sanwar rahe ho miTa ja raha hun main

kya faeda zamane se Takraun kyun 'siraj'

KHud apne raste se haTa ja raha hun main