har lamha agar gurez-pa hai
har lamha agar gurez-pā hai
tū kyuuñ mire dil meñ bas gayā hai
chilman meñ gulāb sambhal rahā hai
ye tū hai ki shoḳhi-e-sabā hai
jhuktī nazreñ batā rahī haiñ
mere liye tū bhī sochtā hai
maiñ tere kahe se chup huuñ lekin
chup bhī tū bayān-e-mudda.ā hai
har des kī apnī apnī bolī
sahrā kā sukūt bhī sadā hai
ik umr ke baa'd muskurā kar
tū ne to mujhe rulā diyā hai
us vaqt kā hisāb kyā duuñ
jo tere baġhair kaT gayā hai
maazī kī sunā.ūñ kyā kahānī
lamha lamha guzar gayā hai
mat maañg duā.eñ jab mohabbat
terā merā muāmla hai
ab tujh se jo rabt hai to itnā
terā hī ḳhudā mirā ḳhudā hai
rone ko ab ashk bhī nahīñ haiñ
yā ishq ko sabr aa gayā hai
ab kis kī talāsh meñ haiñ jhoñke
maiñ ne to diyā bujhā diyā hai
kuchh khel nahīñ hai ishq karnā
ye zindagī bhar kā rat-jagā hai
har lamha agar gurez-pa hai
tu kyun mere dil mein bas gaya hai
chilman mein gulab sambhal raha hai
ye tu hai ki shoKHi-e-saba hai
jhukti nazren bata rahi hain
mere liye tu bhi sochta hai
main tere kahe se chup hun lekin
chup bhi tu bayan-e-muddaa hai
har des ki apni apni boli
sahra ka sukut bhi sada hai
ek umr ke ba'd muskura kar
tu ne to mujhe rula diya hai
us waqt ka hisab kya dun
jo tere baghair kaT gaya hai
mazi ki sunaun kya kahani
lamha lamha guzar gaya hai
mat mang duaen jab mohabbat
tera mera muamla hai
ab tujh se jo rabt hai to itna
tera hi KHuda mera KHuda hai
rone ko ab ashk bhi nahin hain
ya ishq ko sabr aa gaya hai
ab kis ki talash mein hain jhonke
main ne to diya bujha diya hai
kuchh khel nahin hai ishq karna
ye zindagi bhar ka rat-jaga hai
This content features in following collection(s)
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
