har mausam-e-tapan mein gul-e-tar luTaiye

har mausam-e-tapāñ meñ gul-e-tar luTā.iye

jab log tishna-lab hoñ samundar luTā.iye

kahtā hai harf-e-dostī ab bhī pukār ke

ghar meñ kisī ke aap na patthar luTā.iye

mahloñ meñ qahqahoñ kī hai barsāt roz-o-shab

ḳhushiyāñ kabhī to mere bhī dar par luTā.iye

jab aap ho ke shahr-e-farozāñ se aa.e haiñ

tārīkiyoñ meñ nuur kī chādar luTā.iye

ahbāb chaaT jā.eñge dīmak kī shakl meñ

ab daulat-e-ḳhulūs bhī bach kar luTā.iye

zehnoñ ko tāza-kār banāne ke vāste

sher-o-suḳhan ke phuul barābar luTā.iye

'gauhar' hai be-bisāt abhī shahr-e-fikr meñ

ik din matā-e-ilm bhī is par luTā.iye

har mausam-e-tapan mein gul-e-tar luTaiye

jab log tishna-lab hon samundar luTaiye

kahta hai harf-e-dosti ab bhi pukar ke

ghar mein kisi ke aap na patthar luTaiye

mahlon mein qahqahon ki hai barsat roz-o-shab

KHushiyan kabhi to mere bhi dar par luTaiye

jab aap ho ke shahr-e-farozan se aae hain

tarikiyon mein nur ki chadar luTaiye

ahbab chaT jaenge dimak ki shakl mein

ab daulat-e-KHulus bhi bach kar luTaiye

zehnon ko taza-kar banane ke waste

sher-o-suKHan ke phul barabar luTaiye

'gauhar' hai be-bisat abhi shahr-e-fikr mein

ek din mata-e-ilm bhi is par luTaiye