har nafas aaina mauj-e-fana hota hai

har nafas aa.ina mauj-e-fanā hotā hai

aah kartā huuñ to dard aur sivā hotā hai

khiñchtī jaatī hai usī samt jabīn-e-sajda

jis taraf aap kā naqsh-e-kaf-e-pā hotā hai

phuuT jā ābla-e-pā ki baḌhe terā vaqār

ḳhār-e-sahrā tujhe añgusht-numā hotā hai

juñbisheñ hone lagīñ parda-e-zañgārī meñ

nāla-e-āshiq-e-dil-gīr balā hotā hai

vo na ā.eñge unheñ zid hai tamanna se mirī

maiñ kahūñ laakh to kyā merā kahā hotā hai

hai jabīñ ḳhaak pe aur 'arsh-e-mu'allā pe dimāġh

naqsha āñkhoñ meñ tire dar kā khiñchā hotā hai

saa.il aayā hai tire dar pe ḳhudī ko kho kar

dekhnā hai mujhe kyā aaj 'atā hotā hai

har ravish un kī qayāmat hai qayāmat ai 'aish'

jis taraf jaate haiñ ik hashr bapā hotā hai

har nafas aaina mauj-e-fana hota hai

aah karta hun to dard aur siwa hota hai

khinchti jati hai usi samt jabin-e-sajda

jis taraf aap ka naqsh-e-kaf-e-pa hota hai

phuT ja aabla-e-pa ki baDhe tera waqar

KHar-e-sahra tujhe angusht-numa hota hai

junbishen hone lagin parda-e-zangari mein

nala-e-ashiq-e-dil-gir bala hota hai

wo na aaenge unhen zid hai tamanna se meri

main kahun lakh to kya mera kaha hota hai

hai jabin KHak pe aur 'arsh-e-mu'alla pe dimagh

naqsha aankhon mein tere dar ka khincha hota hai

sail aaya hai tere dar pe KHudi ko kho kar

dekhna hai mujhe kya aaj 'ata hota hai

har rawish un ki qayamat hai qayamat ai 'aish'

jis taraf jate hain ek hashr bapa hota hai