ہر نکتۂ بتاں ہے ادا ساز دل فریب

ہر نکتۂ بتاں ہے ادا ساز دل فریب

خالی نہیں طرب سے یہ ہے ناز دل فریب

ایسے ٹھٹولیوں سے نہ کر بے قرار دل

جینے دے کوئی دم تو اے طناز دل فریب

شکر خدا پھرا ہے مرا نامہ بر شتاب

آ کان میں کہے ہے کئی راز دل فریب

ہے خوف شادی مرگ نہ ہوں اس خوشی سے میں

اس کی زبانی سنتے یہ آواز دل فریب

دیکھا ہی کیا بلا ہے جو بے خود ہے امتیازؔ

کس کی نگاہ مست کا انداز دل فریب

خانہ خراب مجھ سے چھپاوے ہے کیوں بتا

دیکھوں وہ کون ہے ترا دم ساز دل فریب

بھر آہ رو کہا کہ وہ مست شباب ہے

ملتا نہیں کسی سے یہ اعزاز دل فریب