har qadam kahta hai tu aaya hai jaane ke liye

har qadam kahtā hai tū aayā hai jaane ke liye

manzil-e-hastī nahīñ hai dil lagāne ke liye

kyā mujhe ḳhush aa.e ye hairat-sarā-e-be-sabāt

hosh uḌne ke liye hai jaan jaane ke liye

dil ne dekhā hai bisāt-e-quvvat-e-idrāk ko

kyā baḌhe is bazm meñ āñkheñ uThāne ke liye

ḳhuub ummīdeñ bañdhīñ lekin huiiñ hirmāñ nasīb

badliyāñ uTThīñ magar bijlī girāne ke liye

saañs kī tarkīb par miTTī ko pyaar aa hī gayā

ḳhud huī qaid us ko siine se lagāne ke liye

jab kahā maiñ ne bhulā do ġhair ko hañs kar kahā

yaad phir mujh ko dilānā bhuul jaane ke liye

dīda-bāzī vo kahāñ āñkheñ rahā kartī haiñ band

jaan hī baaqī nahīñ ab dil lagāne ke liye

mujh ko ḳhush aa.ī hai mastī shaiḳh jī ko farbahī

maiñ huuñ piine ke liye aur vo haiñ khāne ke liye

allāh allāh ke sivā āḳhir rahā kuchh bhī na yaad

jo kiyā thā yaad sab thā bhuul jaane ke liye

sur kahāñ ke saaz kaisā kaisī bazm-e-sāma.īn

josh-e-dil kaafī hai 'akbar' taan uḌāne ke liye

har qadam kahta hai tu aaya hai jaane ke liye

manzil-e-hasti nahin hai dil lagane ke liye

kya mujhe KHush aae ye hairat-sara-e-be-sabaat

hosh uDne ke liye hai jaan jaane ke liye

dil ne dekha hai bisat-e-quwwat-e-idrak ko

kya baDhe is bazm mein aankhen uThane ke liye

KHub ummiden bandhin lekin huin hirman nasib

badliyan uTThin magar bijli girane ke liye

sans ki tarkib par miTTi ko pyar aa hi gaya

KHud hui qaid us ko sine se lagane ke liye

jab kaha main ne bhula do ghair ko hans kar kaha

yaad phir mujh ko dilana bhul jaane ke liye

dida-bazi wo kahan aankhen raha karti hain band

jaan hi baqi nahin ab dil lagane ke liye

mujh ko KHush aai hai masti shaiKH ji ko farbahi

main hun pine ke liye aur wo hain khane ke liye

allah allah ke siwa aaKHir raha kuchh bhi na yaad

jo kiya tha yaad sab tha bhul jaane ke liye

sur kahan ke saz kaisa kaisi bazm-e-samain

josh-e-dil kafi hai 'akbar' tan uDane ke liye