har qadam khaega Thokar na dikhai dega

har qadam khā.egā Thokar na dikhā.ī degā

aañkh ho band to patthar na dikhā.ī degā

DhūñDhtā kyā hai koī ghar na dikhā.ī degā

shahr dīvār kā hai dar na dikhā.ī degā

qāfila shaam kā guzrā hai yahāñ se ho kar

gard hī gard hai manzar na dikhā.ī degā

dekhnā hai to utarnā hī paḌegā dil meñ

duur se ġham kā samundar na dikhā.ī degā

shahr kī āb-o-havā itnī na masmūm karo

varna DhūñDoge kabūtar na dikhā.ī degā

kuuch kar jaanā sar-e-shām yahāñ se varna

qatl ho jāoge ḳhanjar na dikhā.ī degā

bhiiḌ mil jā.egī har raah meñ har manzil par

kah sako tum jise rahbar na dikhā.ī degā

jhuk ga.e haiñ sabhī darbār meñ ḳhil.at ke liye

daar par koī suḳhanvar na dikhā.ī degā

rāt-din karte raho apne lahū se sairāb

khet dil kā koī banjar na dikhā.ī degā

jab utar jā.egā shohrat kā nasha āñkhoñ meñ

phir koī apne barābar na dikhā.ī degā

DhūñDhtā kis ko hai dastār-e-sadāqat le kar

jism mil jā.eñge ik sar na dikhā.ī degā

ek din dekhnā ai yaar tirī mahfil meñ

sab nazar ā.eñge 'ash.har' na dikhā.ī degā

har qadam khaega Thokar na dikhai dega

aankh ho band to patthar na dikhai dega

DhunDhta kya hai koi ghar na dikhai dega

shahr diwar ka hai dar na dikhai dega

qafila sham ka guzra hai yahan se ho kar

gard hi gard hai manzar na dikhai dega

dekhna hai to utarna hi paDega dil mein

dur se gham ka samundar na dikhai dega

shahr ki aab-o-hawa itni na masmum karo

warna DhunDoge kabutar na dikhai dega

kuch kar jaana sar-e-sham yahan se warna

qatl ho jaoge KHanjar na dikhai dega

bhiD mil jaegi har rah mein har manzil par

kah sako tum jise rahbar na dikhai dega

jhuk gae hain sabhi darbar mein KHilat ke liye

dar par koi suKHanwar na dikhai dega

raat-din karte raho apne lahu se sairab

khet dil ka koi banjar na dikhai dega

jab utar jaega shohrat ka nasha aankhon mein

phir koi apne barabar na dikhai dega

DhunDhta kis ko hai dastar-e-sadaqat le kar

jism mil jaenge ek sar na dikhai dega

ek din dekhna ai yar teri mahfil mein

sab nazar aaenge 'ashhar' na dikhai dega