har qadam par mere armanon ka KHun

har qadam par mere armānoñ kā ḳhuuñ

zindagī terā kahāñ tak saath duuñ

āñdhiyoñ kī zad meñ hai merā vajūd

aur maiñ dīvār kī tasvīr huuñ

kaun ho tum aur kahāñ se aa.e ho

sochtā huuñ apne saa.e se kahūñ

rañg kī duniyā se maiñ uktā gayā

phūl-rut meñ zahr pī kar so rahūñ

chāhtā huuñ tum ko ḳhushbū kī tarah

ab ki maiñ āvāz hī āvāz huuñ

ab koī merā nahīñ mere sivā

aaj apne-āp dil ko toḌ luuñ

maiñ ki paiġhambar nahīñ 'ahmad-ziyā'

kaun sā paiġhām is duniyā ko duuñ

har qadam par mere armanon ka KHun

zindagi tera kahan tak sath dun

aandhiyon ki zad mein hai mera wajud

aur main diwar ki taswir hun

kaun ho tum aur kahan se aae ho

sochta hun apne sae se kahun

rang ki duniya se main ukta gaya

phul-rut mein zahr pi kar so rahun

chahta hun tum ko KHushbu ki tarah

ab ki main aawaz hi aawaz hun

ab koi mera nahin mere siwa

aaj apne-ap dil ko toD lun

main ki paighambar nahin 'ahmad-ziya'

kaun sa paigham is duniya ko dun