har qatar-e-talab-o-shauq mein sab se aage

har qatār-e-talab-o-shauq meñ sab se aage

'ishq kā āḳhirī mansab hai adab se aage

aa dikhā.ūñ maiñ tujhe zabt-e-farāvāñ kyā hai

aah jaatī hī nahīñ sarhad-e-lab se aage

ab to maiñ sabr-o-qanā'at kī du'ā māñgtā huuñ

baat niklī hai tamanna-o-talab se aage

kyā ġhalat log haiñ kahte haiñ ki hai bāġh-e-bahisht

qatl-e-nāhaq se udhar ġhaiz-o-ġhazab se aage

sust-raftār nahīñ ham kisī sūrat 'āsim'

yaar nikle haiñ kisī aur sabab se aage

har qatar-e-talab-o-shauq mein sab se aage

'ishq ka aaKHiri mansab hai adab se aage

aa dikhaun main tujhe zabt-e-farawan kya hai

aah jati hi nahin sarhad-e-lab se aage

ab to main sabr-o-qana'at ki du'a mangta hun

baat nikli hai tamanna-o-talab se aage

kya ghalat log hain kahte hain ki hai bagh-e-bahisht

qatl-e-nahaq se udhar ghaiz-o-ghazab se aage

sust-raftar nahin hum kisi surat 'asim'

yar nikle hain kisi aur sabab se aage