ہر رگ گل باد صرصر کے نشاں ٹھہرے ہوئے

ہر رگ گل باد صرصر کے نشاں ٹھہرے ہوئے

ہیں کسی دائم خزاں میں گلستاں ٹھہرے ہوئے

ایک تصویر تماشا چل رہی ہے رات دن

اور کئی منظر ہیں آنکھوں سے نہاں ٹھہرے ہوئے

گم حدیث نفس ہے ہرزہ سرائی میں کہیں

اور بام ہوش ہیں وہم و گماں ٹھہرے ہوئے

ایک سناٹے کی تہہ میں سر پٹختی ہے صدا

چشمۂ لب پر ہیں کیا سنگ گراں ٹھہرے ہوئے

روز و شب کے زائچوں میں ہے مقید زندگی

اور ہیں وقت نزع میں جسم و جاں ٹھہرے ہوئے

دل پہ اب الہام اترتے ہیں عذابوں کی طرح

ہیں سروں پر کیسے کیسے آسماں ٹھہرے ہوئے

منت معنی نہیں ہے لذت بے اختیار

نحو حیرت میں ہیں سب حرف و بیاں ٹھہرے ہوئے

جس گھڑی اس سے ملے تھے وہ گھڑی بیتی نہیں

ہم تو کب سے ہیں وہیں عمر رواں ٹھہرے ہوئے

رات دن کرتا ہوں میں خون جگر سے اہتمام

ہیں سرائے جاں میں میرے میہماں ٹھہرے ہوئے

دل پلٹتا ہے کتاب عمر کو کیوں بار بار

سحر کیا ہیں داستاں در داستاں ٹھہرے ہوئے

ڈھونڈتے ہو تم ہمیں کیا روز و شب کے درمیاں

ہے جہاں کچھ اور ہی ہم ہیں جہاں ٹھہرے ہوئے