har roz naya hashr sar-e-rahguzar tha

har roz nayā hashr sar-e-rāhguzar thā

ab tak kā safar ek qayāmat kā safar thā

andāza-e-hālāt thā pahle hī se mujh ko

darpesh jo ab hai vo mire pesh-e-nazar thā

sunte haiñ ki ābād yahāñ thā koī kumba

āsār bhī kahte haiñ yahāñ par koī ghar thā

tai ham ne kiyā saarā safar yak-o-tanhā

juz gard-e-safar koī na hamrāh-e-safar thā

sad haif ka.ī log ga.e jaañ se mire saath

qātil ko to matlūb faqat merā hī sar thā

merī hī tarah jaañ se guzar kar chale aate

kuchh is se ziyāda to na raste meñ ḳhatar thā

rahtā thā kabhī merī nigāhoñ meñ shab-o-roz

ik vaqt thā jab vo mirā mahbūb-e-nazar thā

kyā vo koī jhoñkā thā nasīm-e-saharī kā

yā rahguzar-e-ḳhvāb pe ḳhushbū kā safar thā

ham jā ke kahāñ bādiya-paimā hue 'mohsin'

jis dasht meñ sabza na kahīñ koī shajar thā

har roz naya hashr sar-e-rahguzar tha

ab tak ka safar ek qayamat ka safar tha

andaza-e-haalat tha pahle hi se mujh ko

darpesh jo ab hai wo mere pesh-e-nazar tha

sunte hain ki aabaad yahan tha koi kumba

aasar bhi kahte hain yahan par koi ghar tha

tai hum ne kiya sara safar yak-o-tanha

juz gard-e-safar koi na hamrah-e-safar tha

sad haif kai log gae jaan se mere sath

qatil ko to matlub faqat mera hi sar tha

meri hi tarah jaan se guzar kar chale aate

kuchh is se ziyaada to na raste mein KHatar tha

rahta tha kabhi meri nigahon mein shab-o-roz

ek waqt tha jab wo mera mahbub-e-nazar tha

kya wo koi jhonka tha nasim-e-sahari ka

ya rahguzar-e-KHwab pe KHushbu ka safar tha

hum ja ke kahan baadiya-paima hue 'mohsin'

jis dasht mein sabza na kahin koi shajar tha