har sans hai sharh-e-nakaami phir ishq ko ruswa kaun kare

har saañs hai sharh-e-nākāmī phir ishq ko rusvā kaun kare

takmīl-e-vafā hai miT jaanā jiine kī tamannā kaun kare

jo ġhāfil the hushiyār hue jo sote the bedār hue

jis qaum kī fitrat murda ho us qaum ko zinda kaun kare

har sub.h kaTī har shaam kaTī bedād sahī uftād sahī

anjām-e-mohabbat jab ye hai is jins kā saudā kaun kare

hairāñ haiñ nigāheñ dil be-ḳhud mahjūb hai husn-e-be-parvā

ab arz-e-tamannā kis se ho ab arz-e-tamannā kaun kare

fitrat hai azal se pābandī kuchh qadr nahīñ āzādī kī

nazroñ meñ haiñ dilkash zanjīreñ ruḳh jānib-e-sahrā kaun kare

har sans hai sharh-e-nakaami phir ishq ko ruswa kaun kare

takmil-e-wafa hai miT jaana jine ki tamanna kaun kare

jo ghafil the hushiyar hue jo sote the bedar hue

jis qaum ki fitrat murda ho us qaum ko zinda kaun kare

har subh kaTi har sham kaTi bedad sahi uftad sahi

anjam-e-mohabbat jab ye hai is jins ka sauda kaun kare

hairan hain nigahen dil be-KHud mahjub hai husn-e-be-parwa

ab arz-e-tamanna kis se ho ab arz-e-tamanna kaun kare

fitrat hai azal se pabandi kuchh qadr nahin aazadi ki

nazron mein hain dilkash zanjiren ruKH jaanib-e-sahra kaun kare