har shab ek hi KHwab se uljha rahta hun

har shab ek hī ḳhvāb se uljhā rahtā huuñ

maiñ dariyā huuñ phir bhī pyāsā rahtā huuñ

din kī fasl kaTe to shaam Dhale aksar

ḳhvāboñ kī dīvār se chipkā rahtā huuñ

havā kī zad pe maiñ ik aisā sūraj huuñ

shaam se hī raste pe rakkhā rahtā huuñ

chalte chalte dariyā jab thak jaate haiñ

yaad ke gahre sāgar meñ Duubā rahtā huuñ

soch kī galiyoñ meñ āvāra phirtā huā

ghar ke darvāze par tanhā rahtā huuñ

shāyad koī mujhe jagāne aa jaa.e

is ḳhvāhish meñ pahroñ soyā rahtā huuñ

raushniyoñ kā ghar bhī nahīñ miltā 'maḳhdūm'

sūraj kā saayā huuñ bhāgā rahtā huuñ

har shab ek hi KHwab se uljha rahta hun

main dariya hun phir bhi pyasa rahta hun

din ki fasl kaTe to sham Dhale aksar

KHwabon ki diwar se chipka rahta hun

hawa ki zad pe main ek aisa suraj hun

sham se hi raste pe rakkha rahta hun

chalte chalte dariya jab thak jate hain

yaad ke gahre sagar mein Duba rahta hun

soch ki galiyon mein aawara phirta hua

ghar ke darwaze par tanha rahta hun

shayad koi mujhe jagane aa jae

is KHwahish mein pahron soya rahta hun

raushniyon ka ghar bhi nahin milta 'maKHdum'

suraj ka saya hun bhaga rahta hun